【最近有個小同話幫個女退學……】
我有位小學同學，等我形容下先，係位斯文、有學識、有想法嘅一位女生。佢最近一個決定，令我有所反思。
上月底開始復課，social media見到唔少朋友post上仔女返學嘅相。大部份朋友都有甩難嘅感覺，仔女終於返學讀書，自己多返時間做嘢，真係值得開香檳慶祝。不過我呢位小學同學，竟然決定幫個K1女女退學。
「每日只係學寫字，點解同媽媽你講嘅『返學』唔同嘅？我寧願留喺屋企。」個女返咗一星期學，就好唔開心同我小學同學投訴。
原來疫情措施下，學校啲玩具、遊樂措施封晒，加上要追番落後進度，小朋友每日返學基本上無晒遊戲時間，只係坐定定寫字寫字同寫字。
我小學同學平時講talk，再刁鑽問題都答到，但今次真係駁唔到個女。
佢最後決定幫個女退學，小朋友返學只係學寫字，的確同自己喺屋企教無大分別，最多自己辛苦少少，只要個女做到停課不停學，疫情期間對佢影響唔會太大。
今次小學同學就點醒我，其實學習係要睇環境，但更重要係睇心態。我聽過有朋友話等疫情後先考慮進修讀書，希望有個正常返學環境。依家諗深一層，屋企用zoom上堂又如何呢？只要你想學嘅動力夠大，屋企都可以係「學校」，疫情唔應該成為拖延學習嘅爛藉口。
Search